– Гэта найперш агульны поспех усіх работнікаў. Наш калектыў працуе, як добра наладжаны механізм. У нас адна мэта – забяспечыць для кожнага жыхара раёна даступнасць своечасовай і якаснай медыцынскай дапамогі. А гэта ідзе поруч з павышэннем прафесійнага ўзроўню спецыялістаў, добраўпарадкаваннем, належным санітарна-гігіенічным і эстэтычным станам нашых аддзяленняў і бальніц, умацаваннем матэрыяльна-тэхнічнай базы: тут і рамонт, і набыццё новага медыцынскага абсталявання.
Калі гаварыць пра тое, што нас вылучыла сярод іншых удзельнікаў агляду, то гэта леташняе адкрыццё міжраённага аддзялення гемадыялізу, зніжэнне смяротнасці насельніцтва ў працаздольным узросце, узровень дыспансерызацыі, наяўнасць трэцяй выязной брыгады аддзялення хуткай медыцынскай дапамогі, паказчык замацаванасці маладых спецыялістаў.
Пачнем з міжраённага аддзялення гемадыялізу. Нагадаю, яно адкрылася 8 красавіка 2019 года і за мінулы перыяд паказала выключна станоўчыя вынікі дзейнасці. Бо яно паляпшае даступнасць аказання высокатэхналагічнай медыцынскай дапамогі і скарачае час дастаўкі да дыялізнага цэнтра жыхароў нашага і бліжэйшых раёнаў, якім неабходна ныркава-замяшчальная тэрапія. На сёння аддзяленне абслугоўвае 16 чалавек з Карэліцкага і Навагрудскага раёнаў і часова яшчэ 6 пацыентаў з Дзятлаўскага і Лідскага.
Па смяротнасці ў працаздольным узросце паказчыкі наступныя. За мінулы год такіх выпадкаў у раёне зарэгістравана 63, смяротнасць склала 6,5 на 1000 працаздольнага насельніцтва. У 2018 годзе было 72 памерлых, смяротнасць – 7,4 на 1000 працаздольных жыхароў. Такім чынам, мы маем зніжэнне на 12,2%.
Дарэчы, паменшыўся і паказчык цяжкасці першаснай інваліднасці ў працаздольным узросце з 50% у 2018 годзе да 45,6% у 2019 (пры абласным – 47,5%).
Значная ўвага была летась нададзена паляпшэнню стану здароўя сярод усіх узроставых груп, але найперш дарослага насельніцтва, шляхам дыспансерызацыі. У раёне яна праведзена на 99,2%, у асоб працаздольнага ўзросту — на 99,4%, упершыню выяўлена захворванняў у 25,7% выпадкаў.
Між іншым, сёлета пазітыўны вопыт Карэліцкай ЦРБ па арганізацыі дыспансерызацыі насельніцтва і праходжанні прафаглядаў у працоўных калектывах рэкамендавана ўкараніць ва ўсіх арганізацыях аховы здароўя Гродзенскай вобласці.
Пастаянна прымаюцца меры па ўкамплектаванні падраздзяленняў кадрамі. У мінулым годзе калектыў папоўніўся 20 маладымі спецыялістамі. Тыя, якія прыехалі па размеркаванні, своечасова атрымалі пад’ёмныя і праязныя. Таксама ім ідзе даплата ў памеры ад 20% аклада і вышэй, пры неабходнасці прадастаўляецца жыллё. Замацаванасць маладых спецыялістаў у 2019 годзе склала 80%. Для параўнання ў 2018 годзе мы мелі лічбу 61%.
Хочацца асобна сказаць і пра тое, што далейшае развіццё ў 2019 годзе атрымала тэхналогія медыцынскай дапамогі па прынцыпе ўрача агульнай практыкі. Усе сельскія амбулаторыі працягваюць працаваць у гэтым напрамку, забяспечаны кадрамі і неабходным абсталяваннем для правядзення прыёму па сумежных спецыяльнасцях. Доля ўрачоў агульнай практыкі склала 100%, а ўсяго камандаў УАП у раёне арганізавана 14.
Яшчэ можна прывесці шэраг станоўчых вынікаў працы нашай раённай бальніцы за 2019 год. Адначасова яны задаюць нам пэўную планку на будучыню, як і атрыманыя высокія ўзнагароды. І мы працягнем працаваць, але не для лічбаў, а для здароўя карэліччан.