Кореличский районный Центр коррекционно-развивающего обучения и реабилитации отметил свое 20-летие

Слова трымала  дырэктар Карэліцкага раённага Цэнтра карэкцыйна-развіваючага навучання і рэабілітацыі  Алена  Ашманкевіч, якая расказала прысутным гісторыю ўтварэння і развіцця ўстановы.  А таксама выказала словы ўдзячнасці усім нераўнадушным людзям, якія супрацоўнічаюць з установай, дапамагаюць умацоўваць яе матэрыяльна-тэхнічную базу,  работнікам і бацькам.

Са словамі прывітання звярнулася да работнікаў Цэнтра Ірына Асташэвіч, якая адзначыла, што ў цэнтры працуе добры, зладжаны калектыў, які складаецца з высокапрафесійных педагогаў, добрых, цярплівых. Сёння работнікі цэнтра, іх выхаванцы, бацькі – адна сям’я, дзе ўсе праблемы, маленькія поспехі і перамогі  агульныя, таму і пераадольваць цяжкасці лягчэй, бо яны дзеляцца напалову, а радасці – падвойваюцца.

Да свайго 20-гадовага юбілею супрацоўнікі прыйшлі з поспехамі, якія даказваюць, што асаблівыя дзеці – паўнапраўныя грамадзяне краіны, акружаныя ўвагай і клопатам, якія маюць правы і магчымасці нароўні з усімі.

Ірына Валер’еўна ўручыла Ганаровыя граматы  Карэліцкага раённага выканаўчага камітэта памочнікам выхавальнікаў Таццяне Капусцінай і Кацярыне Кухто.

Далучыўшыся да віншаванняў з нагоды юбілею,  Вольга Базар зачытала Падзячны адрас за добрасумленную працу калектыву Цэнтра і ўручыла падарачны сертыфікат ад раённага аддзялення Беларускага дзіцячага фонду.

Словы падзякі за цесную сувязь і супрацоўніцва двух Цэнтраў  прагучалі ад Інэсы Сямібратавай, якая сказала:

-Людзі, якія працуюць у гэтай установе, не проста спецыялісты, а педагогі з вялікім сэрцам, якое месціць усю любоў і магчымасць дарыць яе асаблівым дзецям і іх бацькам. Дзеці цэнтра вельмі адчувальныя і ўражлівыя, і педагогі штодня знаходзяць у сабе сілы іх чамусьці навучыць, сагрэць сваім цяплом і дапамагчы адчуць радасць жыцця. Ад вас дзеці прыходзяць да нас, дзе праходзяць далейшую сацыялізацыю.

Цёпла віншавалі калектыў цэнтра з юбілеем таксама прысутныя госці. Яны ўсе дзякавалі педагагічнаму калектыву за добрасумленную працу, прафесіяналізм, а галоўнае – за чулае стаўленне да дзяцей.

У зале прысутнічалі людзі, якія прысвяцілі шмат гадоў  працы ва ўстанове. Віншаванні і шчырыя словы падзякі прагучалі ў іх адрас.

Павіншавала юбіляраў  ад сябе асабіста і ад імя ўсіх  бацькоў,  чые дзеці навучаюцца ў гэтай установе, Таццяна Амельяновіч:

— Сённяшні юбілей – гэта свята цярплівых і разумеючых людзей, якія развіваюць здольнасці нашых дзяцей, імкнуцца іх чаму-небудзь навучыць, сагрэць сваім цяплом, дапамагчы адчуць радасць жыцця, адапціравацца да дарослага жыцця, дапамагаюць ім паверыць у сябе і свае сілы.  Мы ўдзячны ўсім работнікам за іх працу і зычым усяго самага найлепшага.

Яркія нумары мастацкай самадзейнасці  ў выкананні выхаванцаў Карэліцкай дзіцячай школы мастацтваў,  навучэнцаў і выпускніцы ЦКРНіР Аліны Моніч,  а таксама  педагогаў ўстаноў адукацыі раёна  ўпрыгожылі праграму юбілейнай сустрэчы.

Даведачна

ДУА “Карэліцкі раённы Цэнтр карэкцыйна-развіваючага навучання і рэабілітацыі” пачаў працаваць у  жніўні 2003 года з мэтай аказання комплекснай дапамогі дзецям з асаблівасцямі псіхафізічнага развіцця. Узначаліла  Цэнтр Алена Ашманкевіч.

У снежні 2009 года ён атрымаў статус дзяржаўнай установы адукацыі.

На сённяшні дзень  на ўліку   ў цэнтры 266 дзяцей з АПФР. У ЦКРНіР навучаецца і выхоўваецца 16 дзяцей, з іх 15 – дзеці-інваліды. Працуюць 3 спецыяльныя  класы. Тут аказваецца карэкцыйна-педагагічная дапамога дзецям з моўнымі і іншымі парушэннямі. Акрамя гэтага  дзеці навучаюцца па спецыяльных праграмах і атрымліваюць  карэкцыйна-педагагічную дапамогу ў агульнаадукацыйных установах адукацыі: 61 дзіця ў групах (класах) інтэграванага навучання і выхавання і спецыяльных групах, 5  дзяцей школьнага і дашкольнага ўзросту навучаюцца на даму; 173 дзіцяці атрымліваюць дапамогу ў пунктах карэкцыйна-педагагічнай дапамогі.

ЦКРНіР з’яўляецца ўстановай адукацыі, дзе створана комплексная сістэма спецыяльнай, псіхалагічнай, сацыяльна-педагагічнай дапамогі дзецям і падлеткам, якія маюць асаблівасці развіцця, з мэтай сацыяльнай адаптацыі і інтэграцыі іх у грамадстве.

У цэнтры атрымліваюць дапамогу дзеці з моўнымі парушэннямі, з затрымкай псіхічнага развіцця, з дзіцячым цэрэбральным паралічом, з інтэлектуальнай недастатковасцю, з аўтыстычнымі  і з цяжкімі  парушэннямі развіцця. Тут знаходзяць падтрымку і бацькі ў пытаннях развіцця, навучання, выхавання і сацыялізацыі дзяцей з асаблівасцямі псіхафізічнага развіцця. Педагагічныя работнікі дапамагаюць у мадэліраванні працэсу суправаджэння дзяцей з АПФР ва ўстановах адукацыі раёна і ў ажыццяўленні індывідуальнага падыходу ў працы з асаблівымі дзецьмі.