Мирский и Ворончанский филиалы ОАО «Гродненский ликеро-водочный завод» наращивают объемы производства

Галоўная задача – вырабіць якасную прадукцыю

– Асноўная прадукцыя нашага прадпрыемства – спірт-рэктыфікат “Люкс”, “Белальфа”  і канцэнтрат кваснога сусла.  З 1896 года, яшчэ 126 гадоў таму, – расказвае дырэктар Мірскага філіяла Сяргей Тур, – тут рабілі спірт з бульбы, а сёння  асноўная сыравіна – гэта жыта і трыцікале. У гэтым годзе гаспадаркамі  Гродзенскай і Мінскай абласцей на завод пастаўлена 16 тыс. тон  зерня.  Асноўнымі пастаўшчыкамі сыравіны з нашага раёна з’яўляюцца   КУСП  “Чарняхоўскі-Агра”, СВК  “Свіцязянка-2003”,  ДП  “Лукі-Агра”. У другім  паўгоддзі бягучага года павялічылі вытворчасць спірту-рэктыфікату “Люкс” у параўнанні з мінулым годам. Так,  тэмп росту склаў  146%, а вытворчасць канцэнтрату кваснога сусла  –  126,5%. Наша галоўная задача – вырабіць якасную прадукцыю.  Яе  пастаўляем на  ААТ “Гродзенскі лікёра-гарэлачны завод”, а ўжо галаўное прадпрыемства  забяспечвае патрэбы ўнутранага рынку і экспартуе прадукцыю за межы краіны.  Бесперабойную працу прадпрыемства забяспечваюць  85 работнікаў. За студзень–кастрычнік сярэдняя заработная плата на прадпрыемстве склала  980 рублёў.

Намеснік дырэктара – галоўны інжынер Мірскага філіяла ААТ “Гродзенскі лікёра-гарэлачны завод” Андрэй Мазур падчас экскурсіі па прадпрыемстве расказаў пра ўсе этапы вырабу асноўнай прадукцыі  спірту-рэктыфікату “Люкс”,  адзначыўшы,  што ўсе працэсы на заводзе аўтаматызаваныя.  Работнікі сочаць за ўсім, што адбываецца з сыравінай, па маніторах камп’ютараў.  Андрэй Леанідавіч звярнуў увагу і на тое, што на  Мірскім спіртзаводзе  наладжана  безадходная вытворчасць.  Барду,  што застаецца пасля вырабу асноўнай прадукцыі, гаспадаркі раёна выкарыстоўваюць у якасці корму для  жывёлы.

Аператар цэха перагонкі і рэктыфікацыі спірту Наталля Ахава на заводзе адпрацавала ўжо 10 гадоў.  Яна адказная за вядзенне  перагонкі і рэктыфікацыі спірту,   назірае за працэсам   і рэгулюе яго тэхналагічныя  параметры: тэмпературу на кантрольных кропках, ціск у калонах устаноўкі, прадуктыўнасць устаноўкі. У яе абавязкі ўваходзіць і  назіранне за выхадам спірту, паўпрадуктаў і пабочных прадуктаў. Прадпрыемства працуе кругласутачна,  пазменна. За суткі  перапрацоўваецца каля 40 тон зерня і вырабляецца  каля 1600 дал спірту.

Аператар цэха перагонкі Мірскага спіртзавода Наталля Ахава

Што датычыцца  канцэнтрату кваснога сусла, то яго вырабляюць па меры спусташэння ёмістасцяў. Прадукцыю забіраюць  ААТ “Лідскае піва”,  Мінская піваварная  кампанія  “Крыніца”.  Спыняе працу завод  толькі адзін раз у год, у чэрвені,  для правядзення тэхнічнага абслугоўвання абсталявання.

Варшчык Мірскага спіртзавода Марына Гімпель

Якасць выпускаемай прадукцыі кантралюе загадчык лабараторыі Кацярына Галавач,  што прыступіла да працы ў 2020 годзе пасля заканчэння Гродзенскага дзяржуніверсітэта  імя  Я. Купалы.  Лабараторыя праводзіць ўваходны кантроль сыравіны і дапаможных матэрыялаў, тэхна-хімічны кантроль вытворчасці прадукцыі на ўсіх стадыях тэхналагічнага працэсу. Як адзначае Кацярына Святаславаўна,  храматограф  у  лабараторыі   не спыняе сваю працу, таму што  ўвесь час неабходна сачыць за якасцю выпускаемай прадукцыі, якая павінна адпавядаць усім нормам. Толькі тады  прадукцыя Мірскага філіяла будзе запатрабавана  не толькі на ўнутраным рынку, але і на знешнім.

Загадчык лабараторыі Мірскага спіртзавода Кацярына Галавач

Смак духмянага хлеба

У канцы XVIII стагоддзя сучасны Варанчанскі спіртзавод быў пабудаваны як сядзібны дом, а ўжо ў 1898 годзе яго перабудавалі пад бровар. У канцы 20-х гадоў мінулага стагоддзя Варанчанскі спіртзавод спецыялізаваўся на  вырабе спірту-рэктыфікату вышэйшай ачысткі, які ў  месяц вырабляў да 200 дал.  Прадпрыемства паспяхова прадавала сваю прадукцыю за мяжу і забяспечвала ўнутраны рынак краіны. Пра тое, як працуе Варанчанскі філіял ААТ “Гродзенскі лікёра-гарэлачны завод”  у нашы дні,  мы даведаліся, адправіўшыся ў агр. Варонча.

Намеснік дырэктара – галоўны інжынер  Варанчанскага філіяла ААТ “Гродзенскі лікёра-гарэлачны завод” Вячаслаў Аколаў падзяліўся:

–  На сённяшні дзень на прадпрыемстве працуе 36 чалавек. Асноўным відам вырабляемай  нашым заводам прадукцыі з’яўляецца сухі жытнi солад.  Як вядома,  ён выкарыстоўваецца пры вырабе розных гатункаў хлеба, спецыяльных гатункаў пячэння. Гэта 100% натуральны, экалагiчна чысты прадукт,  для вырабу якога выкарыстоўваецца жыта і вада. Солад надае арыгінальны смак  і  водар  хлебу. У бягучым годзе прадпрыемства вырабіла 620 тон жытняга соладу, рэалізавала 528 тон прадукцыі. Сёння асноўны рынак  збыту  –  унутраны.  Жытні солад з Варончы накіроўваецца  на філіялы  хлебазаводаў  Гродзенскай, Брэсцкай і Мiнскай абласцей.  Асноўнымі спажыўцамі з’яўляюцца  фiлiялы  Баранавіцкага хлебазавода  ААТ “Берасцейскі пекар”, Лідскі хлебазавод  ААТ “Гроднахлебпрам”, РУП “Барысаўхлебпрам”, ТАА “АльфаЛюксПлюс”. У гэтым годзе экспартавалі прадукцыю  ў Расійскую Федэрацыю і Украіну.

Спадарожная вытворчасць – выраб шклоамывальнай вадкасці. Сёння ў Варончы выпускаюць  вадкасць  “АЛМАZ” розных  тэмператур  замярзання (ад -30 С  да -300 С). У зiмовы час такая прадукцыя асабліва запатрабаваная. За лiстапад бягучага года выраблена 23 тоны шклоамывальнай вадкасці. Збыт  ідзе на ўнутраны рынак: Гродзенскія, Ваўкавыскія, Маладзечанскія электрасеткі, Аўтобусны парк № 4 г. Ваўкавыск,  Дзяржаўная інспекцыя аховы жывёльнага і расліннага свету пры Прэзідэнце Рэспублікі Беларусь, мэблевая фабрыка “Лагуна”, філіял “Лідскі хлебазавод” ААТ  “Гроднахлебпрам”,  ПП  “ШАТЭ-М” і  інш.

Выпуск вадкасці «АЛМАZ» на Варанчанскім спіртзаводзе

Распрацавана рэцэптура на выпуск дэзсродкаў  для апрацоўкі рук і паверхняў, але такія сродкі сёння  не настолькі запатрабаваныя на  рынку, як з пачатку пандэміі COVID-19, таму гэтая лінейка працуе па запатрабаванасці.

–          На Варанчанскі  філіял  ААТ “Гродзенскі лікёра-гарэлачны завод” прыйшла  на  работу  ў  жніўні  гэтага года,–  гаворыць пра сябе малады спецыяліст інжынер-тэхнолаг Надзея Прасюк.– Родам  я  з Брэста, скончыла Беларускі дзяржаўны ўніверсітэт харчовых  і хімічных тэхналогій у Магілёве. Заўсёды хацела  пачаць працоўную дзейнасць на невялікім прадпрыемстве, бо лічу, што менавіта тут можна вучыцца і ўдасканальваць набытыя на студэнцкай лаве веды. У мае прафесійныя абавязкі ўваходзіць кантроль за вытворчасцю,  захаваннем тэхналогіі перапрацоўкі сыравіны,  якасцю гатовай прадукцыі, афармленнем дакументаў і справаздач. Мяне ўсё задавальняе. Атмасфера ў калектыве добрая, радуе, што наша прадукцыя вядомая, яна якасная, запатрабаваная і карыстаецца попытам у многіх арганізацыях рэспублікі.

Інжынер-хімік Варанчанскага спіртзавода Ніна Аліферка