Карэліччан сустрэў дэпутат Палаты прадстаўнікоў Нацыянальнага сходу Аляксандр Сонгін, які правёў невялікую экскурсію па Авальнай зале, расказаў, як праходзяць пасяджэнні.
Перад членамі Палаты прадстаўнікоў і Савета Рэспублікі з дакладам “Аб мерах па павышэнні эфектыўнасці работы будаўнічага і транспартнага комплексаў, жыллёва-камунальнай гаспадаркі” выступіў намеснік прэм’ер-міністра Рэспублікі Беларусь Анатоль Сівак, які адзначыў, што меры, прынятыя Кіраўніком краіны і Урадам у мэтах актывізацыі інвестыцыйнай дзейнасці, дазволілі выйсці на станоўчыя паказчыкі работы галіны. Так, напрыклад, аб’ёмы падрадных работ за дзевяць месяцаў 2023 года ў параўнанні з аналагічным перыядам мінулага года выраслі на 12,3%, валавая дабаўленая вартасць у будаўніцтве павялічылася на 9,7%.Завяршыўшы даклад, прэм’ер-міністр адказаў на пытанні парламентарыяў. Таксама далі адказы на пытанні дэпутатаў міністр транспарту і камунікацый Аляксей Ляхновіч і міністр жыллёва-камунальнай гаспадаркі Генадзь Трубіла.
Пасля пасяджэння з карэліччанамі сустрэўся намеснік старшыні Пастаяннай камісіі па міжнародных справах, старшыня Ліберальна-дэмакратычнай партыі Беларусі Алег Гайдукевіч, які расказаў моладзі пра дзейнасць партыі, планы на жыццё, пра людзей, на якіх раўняецца:
— Заўжды, калі сустракаюся з моладдзю, даю ім тры парады. Па-першае, трэба марыць. Заўжды, калі я ехаў міма гэтага будынка, марыў, што буду тут працаваць. Па-другое, цаніце тое, што вы атрымалі. Я марыў трапіць сюды, а за чатыры гады працы тут пачалася руціна. Я кажу сам сабе: “Чаму ты забыўся, аб чым марыў? Павінен успомніць, што ты хацеў гэтага”. Па-трэцяе, павінны з’яўляцца новыя мары. Неабходна заўсёды ставіць перад сабою новыя задачы, новыя мэты. У канцы жыцця вы будзеце шкадаваць аб тым, што калісьці нечага не паспрабавалі з таго, што хацелі і што маглі зрабіць. Таму, калі хочаш некуды паехаць — едзь, хочаш нешта зрабіць — рабі, закахаўся — прызнайся. Не бойцеся змяняць сваё жыццё, не працуйце на нелюбімым месцы, бо чалавек, які займаецца нелюбімай працай, — нешчаслівы. Яго шкада. Нельга ісці на работу толькі таму, што там вышэй зарплата. Немагчыма працаваць, калі не любіш сваю работу.
— Партыі неабходны для таго, каб выказваць розныя меркаванні, спрачацца, шукаць ісціну ў спрэчках, — лічыць Алег Сяргеевіч. — Не бывае краіны з адным меркаваннем, заўжды будуць розныя погляды на адно і тое ж пытанне. Не верце, калі вам у СМІ кажуць, што дэпутаты прынялі закон адразу. Мы можам доўга сядзець і абмяркоўваць законапраект, высвятляць яго хібы, спрачацца аб ім. І гэта правільна. Мы павінны займацца палітыкай у сваёй краіне, іначай гэтым будзе займацца нехта за нас.
Па словах дэпутата, ён заўжды паважаў людзей, якія перавярнулі сваю сферу дзейнасці. Назваў Алег Гайдукевіч і тых, на каго ён раўняецца:
— Зразумела, гэта мой бацька. Хаця, на першым этапе жыцця я рабіў усё яму назло. Праблема дзяцей знакамітых бацькоў у тым, што яны застаюцца ў іх цені, таму я вырашыў даказаць, што змагу дасягнуць нечага сам. Тата хацеў, каб я стаў ваенным, мама — каб пайшоў у бізнес, бабуля чакала, што я стану банкірам. Таму я вырашыў паступіць у Акадэмію МУС і скончыў яе з чырвоным дыпломам. Яшчэ адзін чалавек, які паўплываў на мяне, — Уладзімір Вольфавіч Жырыноўскі. Ён у свой час перавярнуў постсавецкую палітыку. Але я ніколі не хацеў стаць падобным на яго, бо другога, як ён, не будзе. Заўжды трэба быць самім сабою. Трэці чалавек, на якога я раўняюся — Аляксандр Рыгоравіч Лукашэнка. У 1994 годзе, калі ён першы раз прымаў удзел у выбарах, то моцна выдзеліўся з тых палітыкаў, якія працавалі ў той час.
Таксама дэпутат расказаў, хто для яго патрыёт:
— Чалавек, які любіць сваіх бацькоў, сваю сям’ю. Неабходна пачынаць з гэтага, а далей трэба распаўсюджваць гэту любоў на свой населены пункт, распаўсюджваць яе далей. Любіць сваю краіну не толькі, калі там усё добра, такога не бывае, але і калі там ёсць нейкія праблемы.
Пасля сустрэчы з Алегам Гайдукевічам карэліччане наведалі музей Палаты прадстаўнікоў, дзе ім расказалі гісторыю стварэння гэтага органа ўлады.