Первый заместитель начальника главного управления здравоохранения Гродненского областного исполнительного комитета Андрей Вертоградов встретился с молодыми специалистами Кореличской ЦРБ

У пачатку сустрэчы Андрэй Сяргеевіч расказаў аб рэарганізацыі сістэмы аховы здароўя, якая плануецца ў бліжэйшы час:

— Ідзе невялікая рэарганізацыя ва ўсіх установах, і ў г. Гродна ў тым ліку. На гэта ёсць пэўныя аб’ектыўныя прычыны. Але гутарка не ідзе пра зніжэнне якасці аказання дапамогі. Задача – аказваць яе больш эфектыўна. Ад аптымізацыі мы чакаем невялікага скарачэння расходаў, а сродкі, якія вызваляцца пасля рэарганізацыі, пойдуць на патрэбы ЦРБ. Гэта робіцца для таго, каб палепшыць якасць дапамогі.

Таксама Андрэй Вертаградаў выказаў спадзяванне, што на гэтай сустрэчы атрымаецца наладзіць дыялог:

— Мы прыехалі паслухаць вас, каб пачуць, з якімі праблемамі вы сутыкнуліся, пагаварыць аб тым, як вы бачыце сябе на сваім рабочым месцы. Наша задача – зрабіць так, как вы на гэтым месцы замацаваліся, каб засталіся тут і дапамагалі насельніцтву раёна захоўваць здароўе.

Уладзіслаў Галяк нагадаў медработнікам аб тым, што ім дае званне маладога спецыяліста:

— У вашым калектыўным дагаворы ёсць нормы, якія дазваляюць вам як маладым спецыялістам атрымліваць, напрыклад, кампенсацыю за праезд і арэнднае жыллё. Вы можаце скарыстацца льготным крэдытам на атрыманне тавараў першай неабходнасці, які дапаможа стварыць умовы для пражывання.

Таксама Уладзіслаў Робертавіч сказаў, што ў невялікім раёне значна прасцей дасягнуць пэўнай пасады, але трэба, каб спецыяліст не проста “адпрацаваў дзень і пайшоў дадому”, неабходна паказаць сябе ў грамадскай рабоце, каб яго заўважылі.

— Вы зараз працуеце на свой аўтарытэт у канкрэтным раёне, Карэлічах. А потым, традыцыйна, гэты аўтарытэт будзе працаваць на вас. І пацыенты будуць імкнуцца патрапіць не проста да тэрапеўта, а менавіта да канкрэтнага доктара.

Нэлі Маісеенка павітала маладых спецыялістаў і расказала, якая задача стаіць перад мясцовай уладай:

— Наша задача – усталяваць з вамі кантакт, наладзіць дыялог. Мы павінны ведаць, чаго вам не хапае і што вас турбуе. Мы будзем працаваць, каб вам было прасцей прайсці адаптацыю.

Генадзій Карпаленка расказаў маладым спецыялістам аб арганізацыі работы з моладдзю і тых мерапрыемствах, якія плануюцца.

Закранулі на сустрэчы і тэму інстытута настаўніцтва. За кожным маладым спецыялістам павінен быць замацаваны настаўнік, які на працягу года будзе дапамагаць маладому ўрачу. У Карэліцкім раёне такая практыка існуе, і настаўнікі дапамагаюць сваім маладым калегам нават больш за год.

Маладыя спецыялісты ў сваіх пытаннях закранулі хвалюючыя іх праблемы. Урач акушэр-гінеколаг Анжаліка Лыскоўская спытала пра апарат КТГ з магчымасцю запісу рэзультатаў абследавання, які вельмі неабходны для іх працы. Андрэй Сяргеевіч запэўніў, што гэтая тэма будзе абмеркавана і ён пастараецца дапамагчы.

Урач-хірург Марыя Рымша выказала пажаданне аб набыцці для аддзялення лапараскапічнай стойкі для аперацый. Андрэй Вертаградаў сказаў, што ў кожнай невялікай бальніцы такое дарагое абсталяванне не паставіш, аднак зараз развіваюцца міжраённыя цэнтры, у якіх такі апарат будзе абслугоўваць некалькі раёнаў і пры неабходнасці складаную аперацыю можна правесці там.

Напрыканцы гутаркі госці пажадалі маладым спецыялістам плённай працы на карысць людзей.

Ангеліна Нікіценка, медыцынская сястра педыятрычнага аддзялення, адзначыла: “Сёння я пачула усё, што хацела. Абмеркавалі ўсё, што турбавала калег. Адказы гасцей мяне парадавалі і абнадзеілі. Атрымалася змястоўная гутарка”.