— Амаль трохгадзінная размова са спікерам Савета Рэспублікі прайшла на адным дыханні. Гэта былі жывыя зносіны, падчас якіх Наталля Іванаўна хацела пачуць аб праблемах на месцах ад тых людзей, якія сутыкаюцца з імі непасрэдна. Мы падымалі пытанні, якія хвалююць людзей на вёсцы, але не могуць быць вырашаны на ўзроўні сельсавета, раёна або вобласці. У першую чаргу, гэта ўдасканаленне заканадаўства па розных напрамках, у прыватнасці, што датычыцца зносу старых і пустуючых дамоў. А калі казаць у цэлым, то пытанні задаваліся вельмі розныя: гэта і навядзенне парадку на зямлі, і добраўпарадкаванне, і закрыццё сельскіх магазінаў, ФАПаў і міні-палігонаў па зборы смецця, і многія іншыя. Наталля Качанава паабяцала, што ўсе пытанні ўзяты на кантроль, яны будуць разгледжаны профільнымі міністэрствамі і кожны атрымае канкрэтны адказ.
Дадзеная сустрэча ў чарговы раз даказала, што кіраўніцтва нашай краіны пільную ўвагу надае развіццю не толькі буйных прамысловых цэнтраў, але і сельскіх рэгіёнаў. У сваім выступленні спікер Савета Рэспублікі падкрэсліла, што важная роля ў гэтым напрамку адводзіцца дэпутацкаму корпусу, у тым ліку і пярвічнага ўзроўню. Прыемна ўсведамляць, што да нас прыслухоўваюцца, вывучаюць лепшы наш вопыт, цікавяцца нашым меркаваннем.
Асабіста мне сустрэча дала выдатную магчымасць падзяліцца вопытам з калегамі з усёй краіны, даведацца, як яны ў сваіх рэгіёнах вырашаюць канкрэтныя праблемы, — сказаў Віктар Аркадзьевіч.
Ён таксама адзначыў пасыл Наталлі Качанавай пра тое, што асноўнай задачай улады ў рэгіёнах і дэпутатаў на месцах быў, ёсць і будзе клопат пра людзей.
Удзячны кіраўніцтву раённага Савета дэпутатаў за магчымасць прыняць удзел у правядзенні такога важнага форуму і тым самым адчуць сваё дачыненне да вырашэння пытанняў дзяржаўнай важнасці і мясцовага жыцця.