Лета — цудоўная пара года. Асабліва любіць цёплыя дзянькі дзетвара. Шмат клапоцяцца пра іх дарослыя: яны робяць усё магчымае для летняга адпачынку дзяўчынак і хлопчыкаў.
Па ініцыятыве камісіі па справах непаўналетніх раённага выканаўчага камітэта штогод у населеных пунктах раёна праводзяцца дзіцячыя сельскія сходы. Як адзначае намеснік старшыні камісіі Вольга Базар, іх мэта — сістэматызаваць веды непаўналетніх аб правілах бяспечнай жыццядзейнасці, навучыць пазбягаць і ўмець прадухіліць небяспечныя сітуацыі, папярэджваць супрацьпраўныя паводзіны непаўналетніх. Сёлета дзіцячыя сельскія сходы праводзяцца ў фармаце забаўляльна-пазнавальнай праграмы з казачнымі героямі, каб навучыць дзяцей правілам паводзін. А гэта: пытанні пажарнай, дарожнай бяспекі, паводзін на вадзе. На дзіцячы сельскі сход, які праводзіўся ва ўнутраным дворыку ДУА "Сярэдняя школа г.п. Мір імя Г.І. Сташэўскай", прыехалі інспектар сектара прапаганды і ўзаемадзеяння з грамадскасцю Карэліцкага раённага аддзела па надзвычайных сітуацыях Кацярына Зуза, начальнік раённага таварыства выратавання на водах Аляксандр Кандрусік, інспектар інспекцыі па справах непаўналетніх Карэліцкага раённага аддзела ўнутраных спраў Алег Анісімаў і супрацоўнікі Цэнтра сацыяльнага абслугоўвання насельніцтва Карэліцкага раёна. Яе ўдзельнікамі былі мірскія і жухавіцкія школьнікі, а таксама дзяўчынкі і хлопчыкі, якія прыехалі на адпачынак да сваіх родных.
Як адзначае загадчык аддзялення пярвічнага прыёму, аналізу, інфармавання і прагназавання, комплекснай падтрымкі ў крызісных сітуацыях ЦСАН Карэліцкага раёна Алена Уціна, у гэтым годзе выкарыстана новая падача інфармацыі праз гульню з дапамогай казачных герояў. Для дзяцей гэтая форма больш цікавая: дзяўчынкі і хлопчыкі хутчэй засвойваюць правілы паводзін.
Галіна СМАЛЯНКА Фота прадастаўлена камісіяй па справах непаўналетніх райвыканкама
